22.03.2023

За месяц да мабільнага дадатку «ФСАН» Мінпрацы падключыліся больш за 125 тыс. беларусаў<br />

За месяц да мабільнага дадатку "ФСАН" Мінпрацы падключыліся больш за 125 тыс. беларусаў. Аб гэтым расказала кіраўнік Фонду сацыяльнай абароны насельніцтва Міністэрства працы і сацыяльнай абароны Юлія Берднікава ў прэс-цэнтры БЕЛТА.

Міністэрства працы і сацыяльнай абароны з 1 лютага 2023 года запусціла мабільны дадатак па аператыўным кантролі за выплатай узносаў і працягласцю страхавога стажу. "Ён стаў актыўным інструментам для грамадзян. За месяц карыстальнікамі дадатку сталі ўжо больш за 125 тыс. грамадзян. Дадатак дазваляе перш за ўсё кантраляваць свайго работадаўца - ці ў поўным аб'ёме выплачваюцца ўзносы ў бюджэт Фонду сацыяльнай абароны. Акрамя таго, з дапамогай дадатку можна разлічыць страхавы стаж, каб разумець, ці дасягаецца мінімальны парог для атрымання права на працоўную пенсію", - адзначыла Юлія Берднікава.

Юлія Берднікава растлумачыла, што страхавы стаж з'яўляецца гарантыяй фарміравання правоў на атрыманне працоўнай пенсіі. Пры дасягненні пенсійнага ўзросту ў 2023 годзе (жанчыны - 58 гадоў, мужчыны - 63 гады) страхавы стаж павінен складаць не менш за 19 гадоў, у 2024-м - 19,5 года, у 2025-м - 20 гадоў.

БелТА