06.08.2021

У Беларусі паслугі электрасувязі аказваюць 190 аператараў<br />

У Беларусі па стане на 1 ліпеня 2021 года паслугі электрасувязі аказваюць 190 аператараў, паведамілі БЕЛТА ў прэс-службе Мінсувязі.

У выніку выканання мерапрыемстваў па будаўніцтве і мадэрнізацыі сетак электрасувязі былі дасягнуты наступныя вынікі: колькасць абанентаў стацыянарнага шырокапалоснага доступу ў інтэрнэт склала 3,273 млн, абанентаў IP-тэлебачання - 2,34 млн, абанентаў, падключаных да мультысэрвіснай IMS-платформы, - 3,67 млн. Колькасць абанентаў, падключаных па тэхналогіі GPON, узрасла на 47,2 тыс. і налічвае 2,79 млн.

Шырыня знешняга канала для доступу ў інтэрнэт павялічылася з пачатку года на 277 Гбіт/с і склала 2160 Гбіт/с.

Колькасць абанентаў сотавай рухомай электрасувязі па выніках першага паўгоддзя налічвае 11,696 млн.

"Паслугамі сотавай рухомай электрасувязі другога пакалення (2G) можна скарыстацца на 99,3 працэнта тэрыторыі Беларусі, а трэцяга пакалення (3G) - на 98,4 працэнта, - адзначылі ў прэс-службе. - Ахоп насельніцтва і тэрыторыі краіны паслугамі сотавай рухомай электрасувязі па тэхналогіі LTE павялічыўся і на 1 ліпеня 2021 года склаў 95 працэнтаў і 58,6 працэнта адпаведна".

БелТА