21.01.2026

План супрацоўніцтва Беларусі і ААН на 2026 год падпісаны ў Мінску

План супрацоўніцтва Беларусі і ААН на 2026 год падпісаны ў Мінску, паведамляе карэспандэнт БЕЛТА.

Подпісы пад дакументам паставілі міністр замежных спраў Рэспублікі Беларусь Максім Рыжанкоў і пастаянны каардынатар ААН у Беларусі Расул Багіраў. Як адзначыў у час цырымоніі падпісання кіраўнік МЗС Беларусі Максім Рыжанкоў, у беларускага боку ёсць цвёрдая нацэленасць на рэалізацыю ўсяго комплексу прапанаваных мер. Ён звярнуў увагу на той факт, што ў праграме на бягучы год - 24 мерапрыемствы, што ў два разы больш, чым у мінулым годзе.

"План - паказчык таго, што супрацоўніцтва паміж Беларуссю і ААН развіваецца не стыхійна, а мае сістэмны характар", - падкрэсліў міністр замежных спраў Беларусі. Ён таксама заўважыў: "Мы разумеем, куды ідзём, мы нацэлены на сумесную рэалізацыю ўсяго комплексу прынятых мер, нашых задум".

Кіраўнік МЗС звярнуў увагу на тое, што ў Беларусі праводзіцца вялікая работа па рэалізацыі дакументаў і дамоўленасцей па аанаўскай тэматыцы, праходзіць вельмі шмат разнапланавых мерапрыемстваў, выкарыстоўваюцца ў тым ліку механізмы мяккай сілы, напрыклад, у культуры, спорце для таго, каб сістэмна развіваць у грамадстве прынцыпы і ідэалы ААН. Ён таксама падкрэсліў узаемаўзбагачальны характар супрацоўніцтва Беларусі і ААН.

"Трэба рухацца далей, ісці далей з нармальнай дынамікай", - адзначыў кіраўнік беларускага знешнепалітычнага ведамства. Міністр выказаў словы ўдзячнасці ў адрас прадстаўнікоў агенцтваў сістэмы ААН, беларускіх міністэрстваў і ведамстваў за актыўную работу, што садзейнічае рэалізацыі прынцыпаў Арганізацыі Аб'яднаных Нацый.

План супрацоўніцтва Беларусі і ААН на 2026 год падрыхтаваны ў мэтах развіцця Рамачнай праграмы паміж нашай краінай і Арганізацыяй Аб'яднаных Нацый у галіне ўстойлівага развіцця на 2026-2030 гады, якая была падпісана раней, 29 снежня 2025 года. Рамачная праграма з'яўляецца стратэгічна выверанай дарожнай картай, якая поўнасцю сінхранізавана з нацыянальнымі прыярытэтамі Беларусі - Нацыянальнай стратэгіяй устойлівага развіцця Рэспублікі Беларусь на перыяд да 2040 года і Праграмай сацыяльна-эканамічнага развіцця Рэспублікі Беларусь на 2026-2030 гады. У Рамачнай праграме вызначаны чатыры стратэгічныя прыярытэты і адпаведныя доўгатэрміновыя вынікі па рэалізацыі кожнага з прыярытэтаў: чалавечае развіццё і дабрабыт для ўсіх; інклюзіўная і ўстойлівая эканамічная трансфармацыя; чыстае навакольнае асяроддзе для забеспячэння жыццядзейнасці людзей; інстытуцыянальныя асновы для міру і развіцця.

БелТА