30.04.2021

Беларусь з 1 мая зніжае экспартныя пошліны на нафту і нафтапрадукты<br />

Беларусь з 1 мая зніжае экспартныя пошліны на нафту і нафтапрадукты, якія вывозяцца за межы мытнай тэрыторыі Еўразійскага эканамічнага саюза. Гэта прадугледжана пастановай Савета Міністраў ад 27 красавіка 2021 года нумар 251, паведамляе БЕЛТА са спасылкай на Нацыянальны прававы інтэрнэт-партал.

Згодна з дакументам стаўкі экспартных пошлін зніжаюцца на сырую нафту, мазут, бітум нафтавы, вазелін і парафін, адпрацаваныя нафтапрадукты - да $54,9 за 1 т (раней - $57,6); прамагонны бензін - да $30,1 за 1 т (раней - $31,6); таварныя бензіны, дызельнае паліва, лёгкія, сярэднія дыстыляты, бензол, талуол, ксілолы, масла змазачнае - $16,4 за 1 т (раней - $17,2).

Раней стаўкі вывазных мытных пошлін адносна сырой нафты і асобных катэгорый тавараў, выпрацаваных з нафты, змяняліся з 1 красавіка. Тады яны павышаліся.

БелТА