16.09.2020

Беларусь вылучана ў склад Выканаўчага камітэта СААЗ<br />

Дзяржавы - члены Еўрапейскага рэгіёна Сусветнай арганізацыі аховы здароўя аднагалосна вылучылі Беларусь у склад Выканаўчага камітэта СААЗ, паведамілі БЕЛТА ў прэс-службе Міністэрства аховы здароўя.

У сувязі з пандэміяй каранавіруса 70-я сесія Еўрапейскага рэгіянальнага камітэта СААЗ упершыню ў гісторыі праходзіць у віртуальным фармаце. Прадстаўнікі 53 дзяржаў - членаў СААЗ абмяркоўваюць розныя пытанні аховы здароўя. Сярод важнейшых - процідзеянне пандэміі COVID-19 і новая праграма работы на 2020-2025 гады.

Еўрапейскі рэгіянальны камітэт зацвердзіў дзве краіны ад Еўрапейскай рэгіянальнай групы - Беларусь і Францыю, якім будзе дадзена права назначыць па адной асобе ў склад Выканаўчага камітэта СААЗ на 2021-2023 гады. Да гэтага Беларусь была ў складзе Выканаўчага камітэта СААЗ толькі ў 1948-1950 гадах.

Дэ-юрэ выбранне ў склад камітэта адбудзецца на наступнай сесіі Сусветнай асамблеі аховы здароўя ў маі 2021 года.

Выканаўчы камітэт СААЗ, ключавы орган прыняцця рашэнняў, складаецца з 34 экспертаў.