18.04.2025
У рамках рабочай паездкі старшыня Палаты прадстаўнікоў Нацыянальнага сходу Рэспублікі Беларусь Ігар Сергяенка наведаў сельгаспрадпрыемствы раёна
У рамках рабочай паездкі ў Сенненскі раён старшыня Палаты прадстаўнікоў Нацыянальнага сходу Рэспублікі Беларусь Ігар Сергяенка наведаў сельгаспрадпрыемствы раёна: ААТ "Белая ліпа", КСУП "Саўгас імя Машэрава", УСП "Дружбінец".
Суправаджаў Ігара Сергяенку Алег Макарэвіч, старшыня Сенненскага райвыканкама.
Мэта паездкі - паглядзець, як арганізаваны вяснова-палявыя работы і як завяршаецца зімоўка жывёлы.
Дарэчы, рабочая група Палаты прадстаўнікоў Нацыянальнага сходу Рэспублікі Беларусь у лютым 2025 года наведвала Сенненскі раён па пытанні арганізацыі зімова-стойлавага ўтрымання БРЖ.
Ігар Сергяенка:
- Сённяшняя паездка - гэта фактычна працяг знаёмства з раёнамі Віцебскай вобласці.
Па выніках візіту ў Сенненскі раён хацелася б адзначыць, што на сённяшні дзень актыўна разгорнута работа на палях раёна. Істотных праблемных пытанняў, звязаных з гатоўнасцю і рамонтам тэхнікі, няма. Фактычна 95-97 працэнтаў тэхнікі працуе на палях.
На сённяшні дзень у раёне пасеяна крыху больш за 40 працэнтаў яравых збожжавых культур. Праз тыдзень асобныя гаспадаркі прыступаюць да сяўбы кукурузы.
Па зімоўцы выбарачны кантроль паказаў, што тыя недахопы, якія былі выяўлены ў мінулы раз групай дэпутатаў Палаты прадстаўнікоў, у цэлым ліквідаваны. Вядома, калі казаць пра стан малочна-таварных комплексаў, ферм раёна, з 40 - толькі 4 сучасных комплекса. Астатнія фермы 60-70 гг. пабудовы. Падтрымліваюцца намаганнямі тых людзей, якія там працуюць. Надоі сёння ў гаспадарках раёна вышэйшыя, чым летась. Ёсць зрухі ў лепшы бок, хоць матэрыяльна-тэхнічная база патрабуе карэннай змены.
Падчас паездкі пагутарылі з людзьмі, наведалі прадпрыемствы гандлю, якія забяспечваюць побыт нашых вяскоўцаў. Сур'ёзных нараканняў няма, і калі гаварыць па сетцы Белкаапсаюза, тут яна ў выйгрышным стане ў параўнанні з іншымі раёнамі вобласці. У "Саўгасе Машэрава" ёсць свая крама, дзе рэалізуецца ўласная прадукцыя.
У цэлым, у гаспадарках раёна абстаноўка рабочая. Работы вядуцца ўсюды - наводзіцца парадак на зямлі, уздоўж дарог, у сельскіх населеных пунктах.
