07.10.2020

Какоўчынскае лясніцтва Багушэўскага лясгаса шчыльна супрацоўнічае з мясцовымі ўладамі ў плане добраўпарадкавання тэрыторый<br />

Як паведаміў памочнік ляснічага Канстанцін Архіпаў, у цяперашнім годзе адроджана месца, дзе ў савецкія часы адзначалася свята вясны і праводзіліся маёўкі. Зараз «Лясная паляна» ачышчана ад сухастою, устаноўлена два вялікіх стала «пад даўніну», абсталявана вогнішча і рэгулярна завозяцца дровы.

Па ініцыятыве мясцовых жыхароў абноўлены бераг вадаёма ў аграгарадку Янова, абразанне і выкарчоўванне драўняна-хмызняковай расліннасці праведзена на плошчы 0,2 га. Леснікі з Какоўчына, разам з прадстаўнікамі прадпрыемстваў і арганізацый Сенненшчыны, унеслі сваю лепту і ў рэканструкцыю мемарыяльнага комплексу «Куповать» - на месцы гібелі Героя Савецкага Саюза Канстанціна Заслонава.

Па словах старшыні Какоўчынскага сельсавета Сенненскага раёна Віктара Мандрыка, супрацоўнікі лясніцтва дапамагаюць і ў рэалізацыі заканадаўства аб зносе пустуючых і старых дамоў. Калі ўчастак немагчыма вярнуць у севазварот, яго засаджваюць маладымі дрэвамі. Немалаважна і дакладнае выкананне яшчэ адной сацыяльнай функцыі - забеспячэнне насельніцтва дровамі. Па жаданні заказчыка яму могуць даставіць іглічны сухастой або лісцяныя пароды. У залежнасці ад наяўнасці чаргі тэрмін выканання ад аднаго да сямі дзён.

«Віцебскія весткі» , Сяргей Ляшук

Фота аўтара.