Абмеркаваць пытанні духоўна-маральнага выхавання, перспектывы супрацоўніцтва органаў мясцовага самакіравання, арганізацый Багушэўскага сельсавета з царквой, а таксама шэраг іншых праблем - менавіта для гэтага сабраліся за круглым сталом, што прайшоў у Багушэўскім сельвыканкаме, прадстаўнікі дэпутацкага корпуса, грамадскасці.

Адкрываючы працу дыялогавай пляцоўкі, старшыня раённага Савета дэпутатаў Міхаіл Вiлюга нагадаў пра тое, што 2021-ы абвешчаны Годам народнага адзінства, а ў аснове гэтага адзінства заўсёды ляжалі традыцыі, духоўнасць, патрыятызм. Гаварылася пра гэта і на VI Усебеларускім народным сходзе, дэлегатам якога быў старшыня райсавета. Ён акцэнтаваў увагу прысутных на тым, што трэба пабудаваць такі канструктыўны дыялог, які дапаможа ў тым ліку вырашыць пытанні, якія тычацца жыццезабеспячэння гарпасёлка.

Ну а хто зможа жыццё багушэўцаў зрабіць камфортней, ярчэй і насычаней, калі не яны самі. Тым больш, ініцыятыў у жыхароў пасёлка хапае. Пра многія з іх расказала загадчык Багушэўскiм аддзяленнем сацыяльнай адаптацыі і рэабілітацыі і суправаджаемага пражывання Галіна Секачова. Тут надаецца вялікая ўвага папулярызацыі духоўнай спадчыны нашага народа, традыцыйных хрысціянскіх, сямейных каштоўнасцяў, а праца наладжана ў цесным супрацоўніцтве з рознымі службамі, валанцёрамі. Мерапрыемства па патрыятычнаму выхаванню «З чаго пачынаецца Радзіма», урок маральнасці «Як стаць добрым мужам і жонкай» - гэтыя і многія іншыя формы працы супрацоўнікі аддзялення выкарыстоўваюць з адной мэтай: дапамагчы, аб'яднаць, паказаць правільны шлях.

Працуюць не толькі са школьнікамі, але і іх бацькамі педагогі Багушэўскай школы. Святы народнага календара, дабрачынныя акцыі, розныя праекты сталі добрай традыцыяй ва ўстанове адукацыі. Як і ва ўстановах культуры, дзе назапашаны добры вопыт узаемаадносін з праваслаўным прыходам.

Падчас сустрэчы гучалі і пытанні, вырашыць якія можна толькі пры ўдзеле розных службаў і грамадскасці. Напрыклад, як зрабіць так, каб цікавасць да заняткаў спортам з'явіўся ў кожнай сям'і. Або яшчэ адна задача - арганізацыя суботніка, куды б дарослыя прыйшлі са сваімі дзецьмі і сталі для іх добрым прыкладам. Шмат гаварылася аб сямейным выхаванні і так званых «праблемных» сем'ях, у якіх духоўна-маральны аспект «кульгае». Казалі аб працы з насельніцтвам, шырокай інфармацыйна-асветніцкай працы.

І вядома, выпрацавалі шэраг рашэнняў, рэалізаваць якія плануецца ў далейшай працы.

«Голас Сенненшчыны», Галін Жукава.

Фота аўтара.