25.03.2021

Выхад за межы супрэматычных форм - небалет «Уна дачка Казіміра» пакажуць у Віцебску<br />

У малой зале канцэртнай залы "Віцебск" 27 сакавіка пройдзе супрэматычны небалет "Уна дачка Казіміра" маладзёжнага тэатра "Кола". Паказ перанясе публіку ў звышнатуральную атмасферу і закране самыя чулыя струны душы, паведамілі БЕЛТА ў цэнтры культуры "Віцебск".

Перформанс - асацыяцыя з супрэматычным балетам, паказаным у лютым 1920 года ў адзін вечар з футурыстычнай операй "Перамога над сонцам", якая таксама стала кропкай адліку авангардных ідэй у Віцебску. Што сімвалічна, Уна - дачка Малевіча - нарадзілася ў той жа год.

Супрэматычны балет векавой даўнасці не быў балетам у традыцыйным сэнсе гэтага слова, хутчэй гэта было падобна на перамяшчэнне і нават трансфармацыю геаметрычных фігур на экране, толькі фігурамі былі самі артысты. "Метамадэрнісцкі паказ "Уна дачка Казіміра" - выхад за межы супрэматычных форм у сферу непасрэдна метафізікі, дзе душа дачкі мастака ажывае і існуе толькі разам з яго віцебскімі малюнкамі. Акцёры тут пераўвасобяцца ў арт-аб'екты, дзеючыя ў сістэме кода супрэматызму. Галоўным будзе саркафаг творцы", - адзначылі арганізатары.

Рэжысёр дзейства Улада Цвікі, сцэнаграфія Надзін Бараноўскай, харэаграфію паставіла Алена Сцепанюк. Кансультавала аўтараў перформанса доктар мастацтвазнаўства, прафесар Таццяна Катовіч.

БелТА