16.06.2023

Выстава сувеніраў у народным стылі адкрылася ў Віцебску<br />

Абласная выстава-конкурс дэкаратыўна-прыкладнога мастацтва "Віцебскі сувенір" адкрылася ў Віцебскім абласным метадычным цэнтры народнай творчасці. Аб гэтым карэспандэнту БЕЛТА паведамілі ва ўстанове культуры.

На выставе наведвальнікі могуць убачыць усё багацце сувеніраў, выкананых майстрамі паўночнага рэгіёна.

Тут прадстаўлены вырабы дэкаратыўна-прыкладнога мастацтва, у якіх адлюстраваны нацыянальныя традыцыі і рэгіянальныя асаблівасці тых ці іншых рэчаў, распаўсюджаных на тэрыторыі пэўнай мясцовасці. Таксама госці выставы ўбачаць брэндавыя ўзоры, якія асацыююцца з пэўным раёнам, горадам або вёскай.

У кожнага твора майстра ёсць свая гісторыя, і нават у аналагічных вырабах відаць індывідуальны почырк яго стваральніка. Вырабы выкананы з прыродных і штучных матэрыялаў, некаторыя ўяўляюць сабой цэлыя кампазіцыі і інсталяцыі. Яркія і самабытныя сувеніры выраблены ў розных тэхніках - саломапляценне, лозапляценне, разьба па дрэве, кераміка і ганчарства, вязанне спіцамі і кручкамі, валенне з воўны, ткацтва, размалёўка па тканіне і шкле, выцінанка, пэчварк, апрацоўка скуры і шмат іншага.

Наведвальнікаў выставы не пакінуць абыякавымі лялькі ў нацыянальным адзенні, цацкі, аналагічныя тым, з якімі гулялі маленькія дзеці некалькі стагоддзяў таму, аўтэнтычныя свістулькі з гліны, арыгінальныя ўпрыгажэнні. Хатнія гаспадыні змогуць падгледзець тут некалькі ідэй для дэкарыравання дома і знайсці сабе новае хобі, як, напрыклад, размалёўка дываноў. На памяць наведвальнікі могуць набыць сувенір у традыцыйным стылі.

Выставу з багатай калекцыяй экспанатаў запрашаюць наведаць таксама самых маленькіх жыхароў і гасцей Віцебска, якім абавязкова спадабаюцца незвычайныя і прывабныя сувеніры. Яна будзе экспанавацца да 4 ліпеня.

БелТА