26.06.2024

Першы форум маладых натарыусаў Беларусі і Расіі пройдзе ў Наваполацку і Полацку<br />

У Наваполацку і Полацку 27-28 чэрвеня пройдзе першы форум маладых натарыусаў Беларусі і Расіі, які збярэ больш за 60 спецыялістаў з дзвюх краін. Аб гэтым паведаміў БЕЛТА прэс-сакратар Беларускай натарыяльнай палаты Юрый Лукашэвіч.

Праграма форуму 27 чэрвеня ўключае правядзенне круглага стала на пляцоўцы юрыдычнага факультэта Полацкага дзяржаўнага ўніверсітэта, у ходзе якога маладыя натарыусы падзеляцца сваім вопытам і ведамі, а таксама абмяркуюць пытанні, звязаныя з ажыццяўленнем натарыяльнай дзейнасці і выкарыстаннем інфармацыйных тэхналогій.

На палях форуму таксама адбудзецца ўрачыстае падпісанне пагаднення аб супрацоўніцтве паміж саветамі маладых натарыусаў Беларусі і Расіі. Удзельнікі наведаюць натарыяльную кантору Полацкага раёна і Полацка, ускладуць кветкі да мемарыяльнага комплексу "Зорка". Акрамя таго, для гасцей і ўдзельнікаў мерапрыемства запланавана насычаная культурная праграма, у ходзе якой яны змогуць азнаёміцца з гісторыяй полацкай зямлі.

У БНП адзначылі, што форум маладых натарыусаў Беларусі і Расіі стане традыцыйным і будзе праводзіцца па чарзе на тэрыторыі дзвюх дзяржаў. Асноўная мэта - умацаванне прафесійных і дружалюбных адносін паміж натарыятамі Беларусі і Расіі і абмен практычным вопытам. Арганізатарам форуму выступіла Беларуская натарыяльная палата.

БелТА