13.03.2026

Міжнародны форум маладых кампазітараў імя М.К.Агінскага сабраў у Маладзечне больш за 20 удзельнікаў

13 сакавіка, Мінск /Кар. БЕЛТА/. Міжнародны форум маладых кампазітараў імя М.К.Агінскага сабраў у Маладзечне больш за 20 удзельнікаў. Аб гэтым карэспандэнту БЕЛТА расказалі ў Маладзечанскім дзяржаўным музычным каледжы імя М.К.Агінскага

"Форум, які сёлета атрымаў новы статус і стаў міжнародным, праходзіць на базе нашай установы адукацыі з 12 па 18 сакавіка. У ім прымаюць удзел маладыя беларускія аўтары, а таксама прадстаўнікі практычна ўсіх расійскіх рэгіёнаў. Праводзіцца мерапрыемства ў 2026 годзе 12-ы раз, а галоўнымі мэтамі яго з'яўляюцца не толькі выяўленне маладых перспектыўных аўтараў, але і павышэнне іх прафесійнай кампетэнтнасці", - расказалі ва ўстанове адукацыі.

У рамках форуму запланаваны адукацыйныя лекцыйныя цыклы, майстар-класы вядучых кампазітараў і музыказнаўцаў, практычныя заняткі па фарміраванні ў маладых аўтараў навыкаў работы з сімфанічным аркестрам у працэсе напісання музычных твораў, канцэртных праграм.

"З маладымі кампазітарамі сустрэнуцца такія майстры, як Віктар Зіноўеў, Яраслаў Судзілоўскі, Вячаслаў Арцёмаў (Масква), Георгій Фёдараў (Санкт-Пецярбург) і Дзмітрый Лыбін (Беларусь). Пройдуць майстар-класы і ў рэжыме анлайн. У такім фармаце сустрэчу з маладымі аўтарамі правядзе кампазітар з Санкт-Пецярбурга Настасся Хрушчова, а таксама Дзяніс Курбанаў (Расія)", - расказалі ў каледжы.

Па выніках форуму 18 сакавіка адбудзецца канцэрт, праграма якога ўключыць сімфанічныя творы, напісаныя кампазітарамі-пачаткоўцамі, якія сталі пераможцамі форумаў мінулых гадоў.-0-