16.11.2020

Крупко: інтэграцыйныя структуры АПК Віцебскай вобласці павінны нарошчваць вытворчасць<br />

У ліку найбольш важных задач для інтэграцыйных структур АПК Віцебскай вобласці - нарошчванне вытворчасці, каб мець магчымасць выконваць даўгавыя абавязацельствы. Такое меркаванне выказаў журналістам міністр сельскай гаспадаркі і харчавання Іван Крупко, перадае карэспандэнт БЕЛТА.

Міністр падкрэсліў, што 2020 год быў вельмі няпростым для сельскай гаспадаркі. "Але вяскоўцы дастойна справіліся, здалі сур'ёзны экзамен на прафесіяналізм, кампетэнцыю, а самае галоўнае - самааддачу, адданасць сваёй прафесіі і краіне", - сказаў Іван Крупко.

Паводле яго даных, больш за 90 працэнтаў прадпрыемстваў АПК, якія маюць растэрміноўку крэдыторскай завінавачанасці, забяспечылі ўстойлівы рост і выкананне бягучых фінансавых абавязацельстваў. "Гэта дало магчымасць павялічыць выручку на аднаго работніка ў сельскай гаспадарцы на 17 працэнтаў і павялічыць заработную плату на тыя ж 17 працэнтаў, не абганяючы прадукцыйнасць працы. Сярэдняя заработная плата склала Br890", - праінфармаваў міністр.

На асаблівым кантролі міністэрства і органаў улады на месцах - работа інтэграцыйных структур, створаных у Віцебскай вобласці. "Яны павінны забяспечыць сур'ёзную кіруемасць і дабавіць 18-20 працэнтаў (па аб'ёме вытворчасці. - Заўвага БЕЛТА). Адтэрміноўка па крэдытах і даўгавых абавязацельствах дасць ім магчымасць нарасціць аб'ёмы прадукцыі ў першыя гады, каб забяспечваць выплату растэрмінаваных даўгавых абавязацельстваў, і дасць ім устойліва працаваць, - адзначыў Іван Крупко. - Самае галоўнае на гэтым этапе - забяспечыць рост вытворчасці".