Навіны вобласці

Пархомчык аб прыёмах грамадзян: людзям трэба тлумачэнне, падтрымка і паважлівае стаўленне

Людзі, якія звяртаюцца з пытаннямі, хочуць паважлівага да сябе стаўлення, а калі яго атрымліваюць - у іх "вырастаюць крылы". Аб гэтым на асабістым прыёме грамадзян у Віцебску заявіў намеснік прэм'ер-міністра Пётр Пархомчык, перадае карэспандэнт БЕЛТА.

Сёння намеснік прэм'ер-міністра правёў асабісты прыём грамадзян у Віцебскім аблвыканкаме. Жыхары Віцебска, а таксама Сенненскага раёна звярнуліся да яго з трыма пытаннямі, якія датычыліся паляпшэння жыллёвых умоў, аховы здароўя і афармлення ўчасткаў для пахавання на грамадзянскіх могілках. "Гэта простыя пытанні, якія павінны былі быць вырашаны на месцы, - заўважыў ён, звяртаючыся да прадстаўнікоў мясцовых улад. - Людзі хочуць, каб да іх ставіліся паважліва і слухалі іх".

Сустрэчы з насельніцтвам у такім фармаце намеснік прэм'ер-міністра назваў важным элементам жыцця. Ён звярнуў увагу, што на прыёмы прыходзяць у асноўным людзі пажылога ўзросту. "Гэта людзі, якія сёння не зусім валодаюць сітуацыяй у юрыдычных пытаннях. І ім патрэбна дапамога, тлумачэнне, падтрымка, кансультацыя і паважлівае стаўленне. Як мы ставімся да сваіх бацькоў, так павінны ставіцца да гэтых людзей. Яны многія пытанні (у выніку ўзросту - Заўвага. БЕЛТА) не разумеюць, ім складана зразумець наша хуткае жыццё", - растлумачыў журналістам Пётр Пархомчык.

На яго думку, сустрэчы з насельніцтвам у час прыёмаў грамадзян даюць неабходную інфармацыю і разуменне, якія застаюцца пытанні на месцах, і недагляды сярод раней агучаных даручэнняў. "Часам за фасадамі горада мы не бачым, што адбываецца ў нашых глыбінках, у асобных рэгіёнах. Там таксама нашы людзі жывуць, і яны таксама патрабуюць сапраўды такога ж педантычнага стаўлення да сябе. Гэтыя сустрэчы - зваротная сувязь, якая ў нейкай ступені дае думкі і напрамкі для кіраўніцтва краіны, для кіраўнікоў на месцах", - сказаў на заканчэнне намеснік прэм'ер-міністра.

Грамадзяне, іх прадстаўнікі і прадстаўнікі юрыдычных асоб маглі звярнуцца да Пятра Пархомчыка з пытаннямі ў сферах прамысловасці, энергетычнага комплексу, лясной гаспадаркі і палявання, навуковай, навукова-тэхнічнай і інавацыйнай дзейнасці, а таксама інтэлектуальнай уласнасці.

БелТА