Навіны рэспублікі

VII Форум рэгіёнаў Беларусі і Расіі плануецца правесці ў верасні

VII Форум рэгіёнаў Беларусі і Расіі плануецца правесці ў верасні ў Мінску і Мінскай вобласці. Аб гэтым сёння паведаміў журналістам намеснік старшыні Савета Рэспублікі Анатоль Ісачанка, перадае карэспандэнт БЕЛТА.

Сёння ў Мінску прайшло пасяджэнне беларускай часткі аргкамітэта па падрыхтоўцы і правядзенні Форуму. Удзельнікі абмеркавалі бягучыя арганізацыйныя пытанні. Сумеснае пасяджэнне беларускай і расійскай часткі аргкамітэта запланавана на 16 чэрвеня ў фармаце відэаканферэнцыі. "Сам Форум плануецца ў верасні. Дату вызначаць крыху пазней", - праінфармаваў Анатоль Ісачанка.

"Форум зарэкамендаваў сябе добрай дыскусійнай пляцоўкай, дзе сустракаюцца парламентарыі, губернатары, прадстаўнікі бізнесу. Па традыцыі на яго палях праводзяцца пасяджэнні секцый на розную тэматыку: сельская гаспадарка, будаўніцтва, прамысловасць. Асаблівасць VII Форуму ў тым, што яго тэма - наша агульная Перамога ў Вялікай Айчыннай вайне", - сказаў віцэ-спікер.

Акрамя таго, праграмай прадугледжана правядзенне маладзёжнага форуму, Савета дзелавога супрацоўніцтва, плануецца падпісанне пагадненняў аб супрацоўніцтве паміж рэгіёнамі, заключэнне камерцыйных кантрактаў. Чакаецца, што ўдзельнікамі форуму стануць каля 500 чалавек.