Навіны рэспублікі

Па новай праграме «Сямейны капітал» ужо 4969 шматдзетных сем'яў адкрылі дэпазітныя рахункі

Усяго на 1 жніўня 2020 года для шматдзетных сем'яў адкрыты 86 963 дэпазітныя рахункі "Сямейны капітал", з якіх па праграме 2020-2024 гадоў - 4969, паведамілі БЕЛТА ў Міністэрстве працы і сацыяльнай абароны.

Па праграме "Сямейны капітал" 2015-2019 гадоў для шматдзетных сем'яў адкрыты 81 994 дэпазітныя рахункі на суму $819,94 млн. Памер назначанай у мінулую пяцігодку сумы складаў $10 тыс. для шматдзетных сем'яў, у якіх трэцяе або наступнае дзіця нарадзілася (усыноўлена, удачарона) у перыяд з 1 студзеня 2015 года па 31 снежня 2019 года ўключна. Звярнуцца за назначэннем сямейнага капіталу можна было па 30 чэрвеня бягучага года ўключна - не пазней за шэсць месяцаў з дня нараджэння (усынаўлення, удачарэння) трэцяга або наступных дзяцей.

Па праграме 2020-2024 гадоў для шматдзетных сем'яў адкрыта 4969 дэпазітных рахункаў на суму Br111,803 млн. У новай пяцігодцы памер сямейнага капіталу складае Br22,5 тыс. і назначаецца шматдзетным сем'ям, у якіх трэцяе або наступнае дзіця нарадзілася (усыноўлена, удачарона) з 1 студзеня 2020 года па 31 снежня 2024 года ўключна.

"На 1 жніўня на датэрміновае распараджэнне сродкамі сямейнага капіталу пададзены 19 904 заявы. З іх на паляпшэнне жыллёвых умоў - 16 620, на атрыманне адукацыі - 656, на атрыманне медыцынскіх паслуг - 628 заяў. Прынята 18 116 рашэнняў аб датэрміновым распараджэнні сродкамі сямейнага капіталу", - адзначылі ў Мінпрацы. Больш за ўсё рашэнняў аб размарозцы сямейнага капіталу прынята ў Брэсцкай вобласці - 4168, следам ідуць Мінская - 2913, Гомельская - 2850, Мінск - 2447, Гродзенская - 2164, Віцебская - 1809. Менш за ўсё такіх рашэнняў прынята ў Магілёўскай вобласці - 1765.