Навіны рэспублікі

Конкурс на саісканне прэміі ўрада за дасягненні ў галіне якасці аб'яўлены ў Беларусі

У Беларусі аб'яўлены конкурс на саісканне прэміі ўрада за дасягненні ў галіне якасці, паведамілі БЕЛТА ў прэс-службе Дзяржстандарту.

Прэмія прысуджваецца на конкурснай аснове юрыдычным асобам, незалежна ад форм уласнасці, за дасягненне значных рэзультатаў у галіне якасці і канкурэнтаздольнасці вырабляемай прадукцыі, аказваемых паслуг або выконваемых работ, укараненне інавацыйных тэхналогій і сучасных метадаў менеджменту, а таксама за эфектыўнае і сацыяльна-адказнае вядзенне бізнесу.

Конкурс праводзіцца па мадэлі, якая адпавядае крытэрыям Прэміі СНД за дасягненні ў галіне якасці прадукцыі і паслуг і мадэлі дзелавой дасканаласці Еўрапейскага фонду менеджменту якасці (EFQM). "Гэта дае магчымасць прадпрыемствам-удзельнікам будаваць свой падыход у галіне менеджменту якасці на прынцыпах, што прымяняюцца іх замежнымі партнёрамі", - адзначылі ў Дзяржстандарце.

Прэмія прысуджваецца ў пяці галінах: вытворчасць нехарчовай прадукцыі бытавога прызначэння; вытворчасць харчовай і сельскагаспадарчай прадукцыі; вытворчасць прадукцыі вытворча-тэхнічнага прызначэння (акрамя ўзбраення і ваеннай тэхнікі); аказанне паслуг і выкананне работ; выкананне работ і аказанне паслуг у галіне будаўніцтва.

Вызначае лаўрэатаў і дыпламантаў, а таксама арганізацыі, удастоеныя спецыяльных узнагарод конкурсу (у намінацыях "Лідарства", "Дасканаласць менеджменту", "Сацыяльная адказнасць"), Савет Міністраў.

Для арганізацый малога і сярэдняга бізнесу, якія набралі найбольшую колькасць балаў сярод кампаній з колькасцю да 250 чалавек і не сталі лаўрэатамі і дыпламантамі, прадугледжана дадатковая спецыяльная ўзнагарода "Імкненне да дасканаласці".

Заяўкі і матэрыялы для ўдзелу ў конкурсе прадстаўляюцца да 1 ліпеня 2020 года ў сакратарыят камісіі, сфарміраваны пры Дзяржстандарце.