Навіны рэспублікі

Беларусь і Узбекістан развіваюць узаемадзеянне ў галіне электронных закупак

Беларусь і Узбекістан развіваюць узаемадзеянне ў галіне электронных закупак, паведаміў БЕЛТА прэс-сакратар Беларускай універсальнай таварнай біржы Раман Яніў.

БУТБ сёння правяла для спецыялістаў Узбекскай рэспубліканскай таварна-сыравіннай біржы (УзРТСБ) першы навучальны вебінар, прысвечаны дзяржаўным закупкам у Беларусі. Мерапрыемства адбылося ў адпаведнасці з пагадненнем аб стратэгічным партнёрстве, падпісаным біржамі ў верасні 2018 года.

У час вебінара былі падрабязна раскрыты такія тэмы, як структура і спецыфіка беларускай сістэмы дзяржзакупак, нарматыўна-прававая база, прынцыпы ўзаемадзеяння электронных гандлёвых пляцовак па дзяржзакупках з дзяржаўнай інфармацыйна-аналітычнай сістэмай, а таксама магчымасці ўдзелу замежных пастаўшчыкоў тавараў (работ, паслуг) у закупачных працэдурах. Асобная ўвага была ўдзелена асаблівасцям ажыццяўлення электронных закупак на гандлёвай пляцоўцы www.zakupki.butb.by. Дэталёва апісаны алгарытм дзеянняў удзельніка і заказчыка, парадак правядзення працэдуры закупкі, а таксама адзначаны ключавыя асаблівасці і перавагі пляцоўкі.

"Чакаецца, што інфармацыя, атрыманая ўзбекскім бокам, будзе не толькі садзейнічаць актывізацыі ўзаемадзеяння Беларусі і Узбекістана ў галіне электронных закупак, але і паслужыць інструкцыяй да дзеяння для ўзбекскіх кампаній, якія плануюць працаваць на беларускім рынку", - адзначыў прэс-сакратар.