Навіны вобласці

З абрадавымі ручнікамі «з бабулінага куфару» знаёміць выстава ў Глыбокім

З абрадавымі ручнікамі ручной работы запрашае азнаёміцца Глыбоцкі дом рамёстваў, паведаміла карэспандэнту БЕЛТА загадчык установы культуры Святлана Скавырка.

Паводле яе слоў, на працягу ўжо многіх гадоў супрацоўнікі дома рамёстваў займаюцца пошукавай работай, накіраванай на захаванне аўтэнтычных прадметаў народнага побыту, у тым ліку саматканых ручнікоў, а таксама іх фрагментаў. На выставе "З бабулінага куфару" прэзентаваны тры дзясяткі такіх экспанатаў. Палавіна з іх адносіцца да пачатку і першай палавіны XX стагоддзя і прадастаўлена з фондаў раённага музея, а астатнія створаны сучаснымі майстрамі народнай творчасці.

Сярод найбольш цікавых экспанатаў выставы Святлана Скавырка адзначыла вясельны ручнік з вышыванымі галубамі і вінаграднымі галінкамі, чатырохметровы "набожнік" - спецыяльны ручнік для аздаблення абразоў. Унікальным можна лічыць і ручнік-абярэг 60-х гадоў XX стагоддзя з вышыўкай у выглядзе вазы з каласамі пшаніцы. Яго саткалі дзяўчаты і жанчыны з усёй вёскі. Такі ручнік звычайна перадаваўся з дому ў дом і служыў талісманам ад засухі, голаду і галечы. Не меншую значнасць для захавання традыцый мясцовага народнага ткацтва уяўляюць сабой і ўнікальныя ўзоры, створаныя сучаснымі майстрамі Глыбоцкага раёна.

Азнаёміцца ​​з выставай можна да канца чэрвеня.