Навіны вобласці

У Віцебску пляцоўка для пракату прададзена ў арэнду з перавышэннем цаны ў 116 разоў

У Віцебску на аўкцыёне, арганізаваным гарвыканкамам, права арэнды пляцоўкі для размяшчэння пункта пракату спартыўнага інвентару прададзена за Br4,9 тыс., што ў 116 разоў перавысіла пачатковую цану лота, перадае карэспандэнт БЕЛТА.

На таргі выстаўлялася права сезоннай арэнды 28 участкаў агульнай плошчай амаль 3,9 тыс. кв.м для размяшчэння атракцыёнаў і пунктаў пракату на тэрыторыі паркаў, сквераў і іншых месцаў грамадскага адпачынку. Цікавасць да прадметаў аўкцыёну праявілі 14 удзельнікаў. Напружаная барацьба разгарнулася толькі за два месцы плошчай 10 кв.м пад пункты пракату спартыўнага інвентару ў зоне адпачынку на набярэжнай ракі Віцьбы, якая карыстаецца папулярнасцю сярод гараджан. Права арэнды кожнага з іх прададзена з перавышэннем цаны больш як у 100 разоў - адпаведна за Br3,9 тыс. і Br4,9 тыс. Яны сталі самымі дарагімі пакупкамі на таргах.

Усяго было рэалізавана 13 лотаў, у тым ліку права арэнды месцаў пад надзіманыя і атракцыёны спартыўна-забаўляльнага напрамку, басейны з зорбамі, каруселі ў парку Пераможцаў і на набярэжнай Віцьбы, пракат аўтамабіляў на плошчы Перамогі. Таксама прададзена арэнда на 3 гады пляцоўкі 700 кв.м у парку Пераможцаў пад размяшчэнне механізаванага атракцыёна "Вусень". Агульная сума выручаных на таргах грошай перавысіла Br16,2 тыс., якія папоўняць гарадскі бюджэт.

Паводле інфармацыі арганізатараў аўкцыёну, арандатары абавязаліся выканаць шэраг умоў. Яны павінны забяспечыць эстэтычна прывабны знешні выгляд аб'ектаў, мець дакументы, якія пацвярджаюць бяспеку эксплуатацыі атракцыёна, заключыць дагавор з абслуговай арганізацыяй на прыбіранне тэрыторыі, вываз смецця, устанавіць біятуалет на кожныя два атракцыёны. Акрамя таго, арэнда месцаў на плошчы Перамогі прыпыняецца на перыяд правядзення агульнагарадскіх культурна-масавых мерапрыемстваў, у тым ліку XXIX Міжнароднага фестывалю мастацтваў "Славянскі базар у Віцебску".