Навіны вобласці

Спектакль «Паўлінка» Купалаўскага тэатра ў Наваполацку наведалі больш як 600 гледачоў

Спектакль "Паўлінка" Нацыянальнага акадэмічнага тэатра імя Янкі Купалы 22 лютага ў час паказу ў Палацы культуры "Нафтан" Наваполацка наведалі 610 гледачоў, паведамілі БЕЛТА ў тэатры.

Найстарэйшы спектакль Купалаўскага тэатра ўнесены ў Дзяржаўны спіс гісторыка-культурных каштоўнасцей Беларусі. Яго прэм'ера ў пастаноўцы заслужанага дзеяча мастацтваў БССР Ільва Літвінава адбылася ў 1944 годзе ў горадзе Томску, дзе тэатр знаходзіўся ў эвакуацыі. За час існавання спектакля над ім працавала некалькі пакаленняў лепшых артыстаў краіны, а сам ён стаў школай сцэнічнага майстэрства. Штогод кожны новы тэатральны сезон у Купалаўскім адкрываецца менавіта "Паўлінкай".

Гледачы цёпла ўспрымаюць пастаноўку дзякуючы спалучэнню яркіх народных характараў, цікаваму сюжэту, народным песням і танцам, мілагучнай мове класіка беларускай літаратуры і майстэрству выканаўцаў. Наступны гастрольны паказ "Паўлінкі" адбудзецца на сцэне Магілёўскага абласнога драматычнага тэатра 22 красавіка.

Як дадалі ў тэатры, 22 лютага на Галоўнай сцэне ў Мінску адбыўся паказ спектакля "Школа падаткаплацельшчыкаў". Такім чынам, агульная колькасць гледачоў Купалаўскага за адзін дзень склала 950 чалавек.