Навіны раёна
22 лістапада 2018
Адзіны тарыф на электраэнергію для насельніцтва плануецца ўвесці ў Беларусі ў 2019 годзе
Адзіны тарыф на электрычную энергію для насельніцтва плануецца ўвесці ў Беларусі ў 2019 годзе. Аб гэтым паведаміў журналістам намеснік прэм'ер-міністра Уладзімір Кухараў у час рэспубліканскага семінара-нарады па павышэнні эфектыўнасці будаўнічага комплексу, адказваючы на пытанне карэспандэнта БЕЛТА.
Паводле слоў віцэ-прэм'ера, будаўнічы комплекс нацэлены на стварэнне ўмоў для максімальнага выкарыстання электрычнай энергіі ў жылых дамах. "Адпрацоўваем пытанне па дыферэнцыраваным тарыфе на электрычнасць. Плануем, што ў наступным годзе зробім адзіны тарыф на электрычнасць. Гэта значыць, адменім дыферэнцыраваны, - сказаў Уладзімір Кухараў. - Пасля будаўніцтва БелАЭС у нас будзе ў дастатковай колькасці айчыннай электраэнергіі. Мы бачым, што зможам прадаставіць для насельніцтва танную электраэнергію ў любых аб'ёмах".
Ён адзначыў, што даступны кошт электраэнергіі стане галоўным стымулам для яе максімальнага выкарыстання. "Працуем з Міністэрствам энергетыкі па тарыфах на электраэнергію, якія складуць канкурэнцыю тарыфам на ацяпленне. У бліжэйшы час прыйдзем да тарыфаў, якія будуць зніжаны для дамоў з электрычным ацяпленнем. Акрамя таго, будаўніцтва такіх дамоў дасць магчымасць значна знізіць аб'ём сродкаў, неабходных для будаўніцтва інфраструктуры", - дадаў віцэ-прэм'ер.
Сёння пачаўся двухдзённы рэспубліканскі семінар-нарада па павышэнні эфектыўнасці будаўнічага комплексу. Сярод яго ўдзельнікаў прэм'ер-міністр Сяргей Румас, старшыня Савета Рэспублікі Міхаіл Мясніковіч, старшыня Камітэта дзяржаўнага кантролю Леанід Анфімаў, а таксама кіраўнікі міністэрстваў і канцэрнаў, дырэктары будаўнічых арганізацый, прадстаўнікі грамадскіх арганізацый. Яны наведалі ААТ "МАПІД", дзе азнаёміліся з магчымасцямі вытворчасці індывідуальных жылых дамоў, а таксама жылы комплекс "Новая Баравая". У праграме таксама наведванне ТАА "Сучасныя бетонныя канструкцыі" ў Мінскім раёне і ПУП "Енісей" у Заслаўі.